Almannavarnir: Ekki fara að Öskju

Ekki ljóst hvað er að gerast

Mynd: Skjáskot af vef Vatnajökulsþjóðgarðs

Í mars kom í ljós að allur ís var farinn af Öskjuvatn en það er mjög óvenjulegt að slíkt gerist á þessum árstíma. Vegna þess fóru vísindamenn frá Veðurstofu Íslands og Jarðvísindastofnun Háskóla Íslands í könnunarflug með flugvél Landhelgisgæslunnar, TF-SIF. Í ljós kom að vatnið er alveg íslaust og engar augljósar vísbendingar um ástæðu þess. Mjög ólíklegt er að veðurfræðilegir þættir hafi haft þessi áhrif.

Jarðvísindastofnun og Veðurstofan munu fara í leiðangur á svæðið eftir páska til þess að gera mælingar á svæðinu og koma fyrir tækjabúnaði til frekari mælinga.

Þar sem ekki er að fullu ljóst hvaða atburðarás er í gangi þá vilja lögreglustjórinn á Húsavík og almannavarnadeild ríkislögreglustjórans beina þeim tilmælum til fólks að fara ekki um svæðið að óþörfu.

Sérstaklega er varað við því að fólk fari að Víti eða Öskjuvatni vegna möguleikans á að eitraðar gastegundir séu að leita upp.

Vakin er athygli á því að Vegagerðin hefur bannað allan akstur á hálendisvegum norðan Vatnajökuls vegna ástands vega.

DV ræddi við Magnús Tuma Guðmundsson jarðfræðing í dag sem sagði „Það er greinilega óeðlilegt ástand í þessu vatni. Það er jarðhiti þar sem greinilega hefur aukist mikið. Það er verið að skoða þetta og velta fyrir sér hvernig á að fylgjast með þessu. Það er verið að velta fyrir sér orsökum því þetta er virk eldstöð og við þurfum að átta okkur á því hvað er á ferðinni, “ segir Magnús Tumi sem segir of snemmt að spá fyrir um eldgos í Öskjuvatni.

„Óeðlilegt ástand“ í Öskjuvatni

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.