Ögmundur Jónasson greiddi ekki atkvæði gegn breytingum á Lífeyrissjóði starfsmanna ríkisins árið 1996 sem hann taldi þó „stórkostlega hættulega.“ Ögmundur sat hjá við atkvæðagreiðslu þessara breytingar sem, líkt og hann lýsti í Kastljósi á þriðjudag, snérust um að setja lífeyrissjóðinn í „braskstöðu“ og leita ávallt hámarks ávöxtunar með tilheyrandi áhættusækni.

Frá þessu var greint í kvöldfréttum RÚV. Ögmundur sat um árabil sem stjórnarmaður og stjórnarformaður Lífeyrissjóðs starfsmanna ríkisins en sá sjóður kom afar illa út úr úttekt á lífeyrissjóðunum sem nýverið var birt og upplýst að tap hans nam rúmlega 100 milljörðum króna. Síðan þá hafa öll spjót staðið á Ögmundi sem mætti í mikið hitaviðtali í Kastljósi á þriðjudagskvöld.

Þar upplýsti hann að allt lífeyrissjóðskerfið byggði á braski og það mætti rekja til breytinga sem gerðar voru 1996 og í ársbyrjun 1997.

„Þá var ákveðið að sá sjóður gagnstætt því sem áður hafði verið í opinbera kerfinu, væri sjálfstæður sjóður á markaði sem yrði gert lögum samkvæmt að leita alltaf að hámarks ávöxtun. Þetta var bundið í lög. Það var einn maður á Alþingi sem andmælti þessu og hann situr hér,“ sagði Ögmundur í Kastljósi á þriðjudag og benti á sjálfan sig.

„Ég gerði grein fyrir atkvæði mínu og sagði þetta stórkostlega hættulegt að setja lífeyrissjóðina í þessa braskstöðu að leita ávallt hámarks ávöxtunar,“ bætti hann við.

Í kvöldfréttum RÚV kom hins vegar fram að Ögmundur hafi setið hjá við atkvæðagreiðslu um greinina sem breytti þessu. 51 þingmaður greiddi hins vegar atkvæði með frumvarpinu í heild sinni. Einn sagði nei. Það var ekki Ögmundur, heldur Jón Baldvin Hannibalsson. Ögmundur sagði já.

Sjá einnig:
„Lífeyrissjóðakerfið byggir á braski“

Ögmundur gagnrýndi bankana en keypti samt í þeim