„Þetta er bara sorglegt og afar óhugnanlegt,“ segir íbúi við Skúlaskeið í Hafnarfirði í samtali við DV en karlmaður á þrítugsaldri situr nú í haldi lögreglu grunaður um að hafa orðið konu á fertugsaldri að bana í götunni.

Maðurinn hefur samkvæmt upplýsingum DV verið í óreglu um nokkurt skeið og búið um árabil í húsinu sem sést á meðfylgjandi mynd og hafa nágrannar reglulega orðið hans varir í annarlegu ástandi.

Samkvæmt upplýsingum frá lögreglu var maðurinn undir áhrifum vímugjafa þegar hann gaf sig fram við lögreglu í morgun og greindi frá voðaverkinu.

Áverkar voru líki konunnar sem var látin þegar lögreglan kom á vettvang. Lagt var hald á eggvopn í þágu rannsóknarinnar en maðurinn hefur áður komið við sögu hjá lögreglu.

Íbúum við götuna var að sögn viðmælanda DV afar brugðið þegar fréttir bárust af því í dag hvað gerst hafði í húsinu.