„Fáir stjórnmálamenn hafa unnið þjóð sinni jafn mikið tjón og Davíð Oddsson hefur gert. Hann er því réttnefndur pólitískur hryðjuverkamaður.“ Þetta er á meðal þess sem þingmaðurinn Björn Valur Gíslason skrifar í stuttum pistli á bloggsíðu sinni á Smugunni. Eru þessi hörðu ummæli viðbrögð við Reykjavíkurbréfi Morgunblaðsins, en þar fór Davíð hamförum og kom til að mynda fram með alvarlegar ásakanir í garð Rannsóknarnefndar Alþingis og forsvarmanna stjórnarflokkanna.

Björn Valur segir jafnframt að það sé mikilvægt fyrir Davíð að komas undan vitnaleiðslum fyrir landsdómi, þar sem hann beri svo mikla ábyrgð á ástandinu sjálfur: „Enginn stjórnmálamaður á því jafn mikið undir því og Davíð Oddsson að komast undan vitnaleiðslum fyrir landsdómi. Það er ótrúlegt hvað margir eru viljugir að aðstoða hann við það. Hversvegna ætli það sé?“