Sleðahópar úr björgunarsveitum Slysavarnafélagsins Landsbjargar eru nú á leið í útkall í fjallshlíðum Esju, að því er fram kemur í tilkynningu frá Landsbjörgu. Tilkynning barst frá vélsleðamönnum um 13:40 í dag að einn þeirra hefði orðið fyrir óhappi og þeir þyrftu aðstoð. Viðkomandi fékk höfuðhögg þegar hann féll af sleða sínum á akstri og kvartar yfir verk í höfði, hálsi og baki.

Björgunarsveitarmenn munu fara frá skíðasvæðinu og aka þaðan yfir Skálafell og að slysstað sem er í fjallendi norðan Mósskarðshnjúka. Alls taka um 20 björgunarsveitarmenn þátt í aðgerðinni sem reiknað er með að gangi vel enda færi og veður hið ákjósanlegasta. Þyrla Landhelgisgæslunnar var á æfingaflugi og hefur verið beint á staðinn til aðstoðar.