Þrátt fyrir deilur fyrir dómstólum hefur Björn Leifsson ákveðið að opna enn eina líkamsræktarstöðina undir merkjum World Class. Líkamsræktarstöðin verður opnuð á sama stað og Heilsuakademían var áður í Egilshöllinni í Grafarvogi. Líkamsræktarstöðin er opnuð í skugga ásakana um gjafagjörning Björns þegar hann seldi líkamsræktarveldið út úr eignarhaldsfélagi sínu sem var gríðarlega skuldsett inn í nýtt óskuldsett félag.

Líkamsræktarstöðvar World Class verða eftir opnun nýju stöðvarinnar tíu talsins. Óhætt er að segja að um sé að ræða stærsta heilsuræktarveldi á Íslandi. Stöðvarnar og tækin sem í þeim eru voru seld út úr félaginu ÞS69, sem áður hét Þrek ehf., fyrir 25 milljónir króna. Fyrirtækið fór í gjaldþrot árið 2009 og nema kröfur í þrotabúið 2,2 milljörðum króna.