40 manna stjórn var kosin á stofnfundi stjórnmálaflokksins Bjartrar framtíðar í dag á Kex Hostel. Tveir formenn voru kosnir, Heiða Kristín Helgadóttir sem veitir 40 manna stjórninni formennsku en Guðmundur Steingrímsson var kosinn formaður og jafnframt talsmaður flokksins.

Guðmundur sagði í viðtali við RÚV að flokkurinn væri frjálslyndur, alþjóðlega sinnaður og grænn lýðræðisflokkur. Flokkurinn sé Evrópusinnaður þó að í honum sé fólk með misjafnar skoðanir í Evrópumálum.

Heiða Kristín segir í viðtali við fréttavakt DV að framundan standi til að skrá málefnastefnu flokksins: „Við vorum að stofna flokkinn formlega, kjósa í stjórn og í helstu embætti. Núna framundan munum við setjast niður og koma málefnastefnunni í gang í meiri smáatriðum. Við höfum sett út breiðar línur sem okkur finnst vera grundvallaratriði fyrir fólk að vera sammála um. Svo höfum við ekki ennþá hafið almennilega málefnastarfið niður í smáatriðin enda finnst okkur það vera eitthvað sem á að koma úr starfinu sjálfu en ekki skipunum frá formönnum eða eitthvað álíka.“