Sálfræðilegar þarfir fórnarlamba mansals eru oft mjög miklar og afleiðingar mansalsins hafa haft djúpar sálfræðilegar afleiðingar. Þær glíma gjarnan við alvarlegt þunglyndi og áfallastreituröskun en einnig geta þær átt við áfengis- eða vímuefnavanda.

„Þær upplifa oft ótta og óöryggi því þær hafa lært í flestum tilfellum að það þýðir ekki að treysta á neinn nema sjálfan sig. Þær vita ekki hverjum þær eiga að treysta og öryggiskenndin er engin,“ segir Berglind Guðmundsdóttir, doktor í klínískri sálfræði, um þá sálfræðiaðstoð sem mansalsfórnarlömb þurfa á að halda.

„Það mætti í raun kalla það heilbrigða paranoju, því í þeirra umhverfi var mjög heilbrigt að treysta engum. Heimurinn var raunverulega þannig að ef þú snérir baki í einhvern og slakaðir á gastu lent í því að slasast alvarlega eða jafnvel deyja. Þessi heimur er mjög harður,“ segir Berglind.

Berglind Guðmundsdóttir, doktor í klínískri sálfræði, um heim mansals, er í viðtali í helgarblaði DV. Þar ræðir hún um mansal og fórnarlömb þess en Berglind fær til meðferðar þau fórnarlömb mansals sem þurfa á sálfræðihjálp að halda.