Umboðin þrjú sem Bjarni Benediktsson, núverandi formaður Sjálfstæðisflokksins, fékk til að veðsetja hlutabréfin í eignarhaldsfélaginu Vafningi hjá Glitni í febrúar 2008 voru útbúin þremur dögum eftir þá dagsetningu sem fram kemur á þeim. Skjölin voru dagsett 8. febrúar 2008 og undirrituð af fyrirsvarsmönnum félaganna Hrómundar, Hafsilfurs og BNT, móðurfélags olíufélagsins N1. Félögin þrjú voru í eigu skyldmenna Bjarna að stærstu leyti.

Í stofnupplýsingum umboðanna, PDF-skjölum sem DV hefur undir höndum, kemur hins vegar fram að umboðin hafi verið búin til 11. febrúar. Unnið var í umboðunum þremur í síðasta skipti á tíunda tímanum þann dag. Af gögnum málsins að dæma verður því ekki annað séð en um hafi verið að ræða fölsun á umræddum skjölum.
DV sendi Bjarna spurningar um málið í byrjun vikunnar. Bjarni svaraði hins vegar ekki spurningum blaðsins þrátt fyrir að þær hefðu verið ítrekaðar þrisvar sinnum.

DV fékk þau svör í gegnum þriðja aðila að Bjarni teldi sig vera búinn að svara þessum spurningum. Það stenst þó ekki þar sem spurningarnar byggja á nýjum upplýsingum úr ákæru sérstaks saksóknara í Vafningsmálinu sem gefin var út í desem­ber. Bjarni hefur hins vegar ekki rætt við fjölmiðla um þessar nýju upplýsingar frá því ákæran var gefin út.

Nánar má lesa um málið í helgarblaði DV. Áskrifendur geta lesið alla greinina hér að neðan með því að smella á „Meira“.