Stríðsfréttaritari breska dagblaðsins Sunday Times, Marie Colvin, lést í árás á Sýrlandi. Það er fréttastofa Reuters sem greinir frá málinu en fréttirnar bárust nokkrum klukkustundum eftir að bandaríski fréttaritarinn hafði fært heiminum fréttir af hrikalegu ástandi í borginni Homs.

Franski ljósmyndarinnar Remi Ochlik er einnig sagður hafa látist í árásinni. Eru þau sögð hafa verið að koma sér út úr byggingu, þar sem bráðabirgða fjölmiðlamiðstöð hafði verið komið upp, þegar flugskeyti sprakk á byggingunni.

Í myndbandi sem hún gerði fyrir breska ríkisútvarpið BBC í gær lýsti hún árásum stjórnvalda á borgina. Sagði hún þær vera viðbjóðslegar. „Ég horfði á barn deyja í dag. Algjörlega hryllilegt. Skotum, flugskeytum og eldi rignir látlaust yfir svæði þar sem óbreyttir borgarar búa í borginni.“

Árið 2010 ræddi hún um hættur í starfi við athöfn þar sem fallnir blaðamenn voru heiðraðir. „Verkefni okkar er að greina frá hryllingnum sem fylgir stríði með nákvæmni og án fordóma. Fréttamenn sem fjalla um átök bera mikla ábyrgð og takast á við erfiða valkosti. Stundu gjalda þeir með lífi sínu,“ sagði Colvin sem missti auga í sprengingu í Sri Lanka árið 2002.