Alls greiddi íslenska ríkið 149,6 milljónir króna á sviði þróunarsamvinnu (utan ESB) á árinu 2011. Það er um hundrað og tíu milljónum minna en árið 2010, en þá greiddi Ísland 259,4 milljónir í þróunarsamvinnu. Þetta kemur fram í svari utanríkisráðuneytisins vegna fyrirspurnar Vigdísar Hauksdóttur, þingmanns Framsóknarflokksins. Til þróunarsamvinnu innan ESB greiðir Ísland 1254,6 milljónir.

Barnahjálp Sameinuðu þjóðanna (UNICEF) hlaut hæsta framlagið, 76,9 milljónir sem er stærsta einstaka framlagið árið 2011. Þá hlaut Mannfjöldasjóður Sameinuðu þjóðanna 20 milljónir og Styrktarsjóður gegn kynbundnu ofbeldi fékk 11,3 milljónir. Sjóðirnir eru allir, utan viðskiptaþróunarsjóðs (sjá neðanmálsgrein 3), vistaðir hjá alþjóðastofnunum sem Ísland er aðili að. Framlögin eru valfrjáls og endurspegla áherslur Íslands í þróunarsamvinnu á því tímabili sem yfirlitið nær til. Frá og með árinu 2011 fylgja áherslurnar þingsályktun um áætlun um alþjóðlega þróunarsamvinnu Íslands 2011–2014.

Þróunarsjóður EFTA fékk 1254,6 milljónir króna árið 2011 frá Íslandi.

Vigdís spurði einnig um það hver hefði eftirlit með fjármagninu sem Íslendingar reiða af hendi í þróunarsjóði, en í flestum tilfellum eru það sjóðirnir sjálfir sem sjá um eftirlit. Í svari ráðuneytisins kemur fram að „þróunarsamvinnusvið utanríkisráðuneytisins ber ábyrgð á málefnavinnu sjóða er starfa að þróunarmálum og leggur mat á áframhaldandi stuðning við þá. Auk þess sem reglulegar skýrslur frá sjóðunum sjálfum eru vandlega skoðaðar er fylgst með óháðum utanaðkomandi úttektum sem gerðar á sjóðunum og stofnunum á sviði þróunarsamvinnu. Eftirlit með því fjármagni sem Íslendingar reiða af hendi í Þróunarsjóð EFTA er eftirfarandi. Í fyrsta lagi situr íslenskur fulltrúi í stjórn sjóðsins þar sem fjárhagsáætlanir, verkefni og útgreiðslur til styrkþegalanda eru reglulega kynntar. Í öðru lagi fylgjast utanríkisráðuneytið og fjármálaráðuneytið með því að greiðslur í sjóðinn séu í samræmi við fjárhagsáætlanir sjóðsins og innan fjárheimilda fjárlaga. Í þriðja lagi sinnir skrifstofa sjóðsins umfangsmiklu eftirliti með útgreiðslum til styrkþegalandanna og framgangi verkefna en sjóðurinn starfar samkvæmt ströngum reglum þar að lútandi. Niðurstöður úr eftirliti og eftirfylgni skrifstofu sjóðsins eru reglulega kynntar á stjórnarfundum hans þar sem fulltrúi Íslands hefur tækifæri til að leggja fram athugasemdir. Í fjórða lagi fara ytri endurskoðendur yfir reikninga sjóðsins.“

Hér má sjá svar utanríkisráðuneytisins við fyrirspurnum Vigdísar