Skrifstofustjóri borgarstjórnar hefur sent bréf til alþingis vegna úrskurðar yfirfasteignamatsnefndar um að hesthús skuli skattlögð sem atvinnuhúsnæði en ekki í flokk með íbúðarhúsnæði eins og verið hefur í Reykjavík til þessa. Úrskurðurinn þýðir að fasteignaskattur á meðalstórt hesthús hækkar úr 16.265 kr. í 134.185 kr. Bréfið er sent í framhaldi af umfjöllun borgarráðs um málið 12. janúar sl.

Í fréttum DV í vikunni kom fram að Reykjavíkurborg hefur hækkað fasteignagjöld á hesthús í borginni úr 0,22% af fasteignamati í 1,65%. Þetta er gjaldskrárhækkun upp á 750 prósent og eru hestamenn eru æfir vegna málsins.
Jón Finnur Hansson, framkvæmdastjóri Hestamannafélagsins Fáks í Víðidal, segir hækkunina koma hestamönnum í opna skjöldu. „Það er alveg gífurleg óánægja meðal hesthúsaeigenda með þessa miklu hækkun,“ segir Jón Finnur í samtali við DV. Í bréfi borgarstjórnar er óskað eftir því að Alþingi breyti lögunum þannig að hesthús þaðan sem ekki er rekin atvinnustarfsemi muni færast að nýju í a-lið en undir hann heyrir m.a. íbúðarhúsnæði og sumarbústaðir. Ef lagabreytingin verður að veruleika munu gjöldin lækka aftur hjá þeim hesthúsaeigendum sem ekki reka atvinnustarfsemi í húsum sínum. Aðeins alþingi getur breytt lögunum.

Eins og fram hefur komið í fréttum er það mat borgarlögmanns að Reykjavíkurborg sé skylt að innheimta fasteignagjöld af hesthúsum samkvæmt úrskurðinum.

Í tilkynningu frá skrifstofu borgarstjórnar segir að forsagan að málinu sé sú að árið 2010 úrskurðaði yfirfasteignamatsnefnd í máli hesthúsaeigenda á Selfossi gegn sveitarfélaginu að hesthús/fasteignir sem eru á deiliskipulögðu hesthúsasvæði innan þéttbýlis skyldu skattlögð sem atvinnuhúsnæði. Sveitarfélagið hafði þá fært hesthús í þéttbýli í c-lið álagningar og komst yfirfasteignamatsnefnd að því að það væri rétt ákvörðun.

Sveitarfélögum er skylt samkvæmt lögum að innheimta fasteignaskatta og skiptast þeir í þrjá liði. Í a-lið er m.a. íbúðarhúsnæði og sumarbústaðir, í b-lið er opinbert húsnæði en í c-lið er atvinnuhúsnæði.
Úrskurður yfirfasteignamatsnefndar var alveg ótvíræður og er sveitarfélögum því skylt að flokka hesthús undir c-lið sem atvinnuhúsnæði.

Í bréfi skrifstofustjóra borgarstjórnar segir m.a.: „Það er skoðun Reykjavíkurborgar að eðlilegra teljist að hesthús þaðan sem ekki er rekin atvinnustarfsemi; svo sem hestaleiga, sé með skýrum hætti skattflokkuð með a-lið 3. mgr. 3. gr. laga um tekjustofna sveitarfélaga nr. 4/1995 þar sem m.a. sumarbústaðir eru skattflokkaðir. Talið er að í slíkum hesthúsum fari að meginstefnu fram frístundastarf og falla því sambærileg rök með slíkri skattflokkun og gildir um sumarbústaði.“
Reykjavíkurborg leggur til að lagaákvæðið um a-lið verði svohljóðandi eftir breytingu:
„Íbúðir og íbúðarhús ásamt lóðarréttindum, hesthús þaðan sem ekki er rekin atvinnustarfsemi, erfðafestulönd í dreifbýli og jarðeignir, útihús og mannvirki á bújörðum, sem tengd eru landbúnaði, öll hlunnindi og sumarbústaðir ásamt lóðarréttindum.“

Tengdar fréttirRisahækkun á hestamenn