Öllu starfsfólki Herjólfs hefur verið sagt upp störfum í ljósi þess að núgildandi samningur Eimskips og Vegagerðarinnar um rekstur skipsins rennur út í lok apríl næstkomandi.

Samkvæmt frétt á vef Eyjafrétta er um að ræða 40 manns.

Gunnlaugur Grettisson, rekstrarstjóri Herjólfs í Vestmannaeyjum, segir í samtali við Eyjafréttir að einni hafi verið sagt upp öllum samningum við birgja og þjónustuaðila sem taki gildi 1. maí næstkomandi.

„Ríkið stefnir að því að bjóða verkefnið út á næstu vikum með það fyrir augum að nýr samningur taki gildi 1. maí 2012 og gildi þar til ný ferja verður tekin í notkun árið 2015,“ segir Gunnlaugur í samtali við Eyjafréttir. Þetta setji stafsmenn í erfiða stöðu og skapi óöryggi. Viðurkennir rekstrarstjórinn að hann hafi áhyggjur af því að rót komist á þann góða hóp sem þarna hefur starfað vegna óvissunnar.

Vefur Eyjafrétta