„Fyrstu afborganirnar af láninu voru um 73 þúsund krónur. En þegar mest var voru þær komnar yfir 180 þúsund krónur á mánuði,“ segir Hafsteinn Númason, sextugur leigubílstjóri, sem hefur verið stefnt fyrir dóm af fjármögnunarfyrirtækinu Avant. Hafsteinn tók 4,8 milljóna króna myntkörfulán hjá fyrirtækinu árið 2007 til að fjármagna kaup á Mercedes Benz-bifreið. Hafsteinn, sem starfað hefur hjá Hreyfli í tólf ár, lenti í miklum greiðsluvandræðum eftir efnahagshrunið – lánið hækkaði upp úr öllu valdi en á sama tíma fækkaði verkefnum hans verulega. „Fólk byrjar að skera allan óþarfa niður þegar það er í kröggum og leigubílar flokkast væntanlega undir það.“ Mál Avant gegn Hafsteini var þingfest í Héraðsdómi Reykjavíkur á föstudag. Eftir að hann hafði greitt af láninu í ár þá hækkaði það upp úr öllu valdi. „Ég borgaði bara vextina en ég var við það að gefast upp því ég var að reyna að borga alls staðar. Ég bara réð ekki við þetta,“ segir Hafsteinn.

Nánar er fjallað um málið í DV í dag. Áskrifendur að DV.is geta lesið alla fréttina ef þeir ýta á meira