Ganga Vilborgar á Suðurpólinn hafin

Vonar að enginn hafi séð sig fljúga á hausinn

Vilborg Arna Gissurardóttir hóf í gær göngu sína á Suðurpólnum en áætlað er að ferð hennar á syðsta punkt Jarðar taki um 50 daga.

Vilborg hefur síðustu daga dvalið í tjaldbúðum ALE (antarctic logistics and expeditions) í Union Glacier en þaðan fara flestir leiðangrar á Suðurpólinn. Frá Union Glacier var Vilborgu flogið til Hercules Inlet, þar sem hún hóf gönguna sína. Vilborg var brött í lok fyrsta göngudags en hún bloggar um upphaf göngunnar á heimasíðu sinni:

„Sólóleikar suðurskautsins hófust i dag. Mér var flogið á upphafsstað í morgun og ég var klár klukkan hálf 1 að byrja gönguna. Flaug a hausinn í dag. Frekar vandræðalegt…held samt að enginn hafi séð það . Nú er kósístund i tjaldinu en það gustar aðeins úti. Gekk 6.3 km i dag i góðu veðri.“

Vilborg nýtur stuðnings við leiðangurinn frá ALE og verður hún í sambandi við tjaldbúðirnar amk einu sinni á sólarhring á meðan á ferð hennar um Suðurpólinn stendur.

Áætlað er að ferð Vilborgar frá Hercues Inlet á syðsta punkt jarðar taki um 50 daga og að á hverjum degi gangi hún um 22 km að meðaltali. Hún mun draga á eftir sér tvo sleða með nauðsynlegum búnaði til fararinnar sem vegur í byrjun um 100 kg.

Vilborg Arna fer þessa göngu í þágu Lífs styrktarfélags Kvennadeildar Landspítalans - og geta menn sett sig í spor Vilborgar með því að heita á hana í síma 908 1515 ( 1500 kr) eða með frjálsum framlögum á heimasíðunni www.lifsspor.is.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.