Minnst þrjátíu manns hafa látið lífið í miklum frosthörkum í Úkraínu síðustu daga. Flestir hinna látnu eru heimilislausir og aðrir sem minna mega sín.

Að minnsta kosti 60 manns hafa látið lífið í Austur-Evrópu síðustu sjö daga og af þeim 30 sem vitað er um í Úkraínu fundust 21 líkanna frosin úti á götu. Fimm þeirra létust á sjúkrahúsi eftir ofkælingu og fjórir á heimilum sínum.

540 manns hafa þurft að leita sér aðstoðar á sjúkrahúsi vegna ofkælingar og fylgikvilla hennar. Í suðurhluta landsins eru samgöngur lamaðar sökum mikillar ofankomu og flughálku á vegum úti. Frost hefur mælst 23 gráður í Kíev og víðar í Úkraínu og þurft hefur að loka fjölmörgum skólum og hjúkrunarheimilum.
Yfirvöld hafa þurft að bregðast við með að reisa upphituð tjöld fyrir þá sem eiga í engin hús að vernda.

Í Póllandi hafa minnst fimm frosið í hel síðastliðinn sólarhring og er tala látinna þar komin upp í 15 síðastliðna fjóra daga.