Ef þú ert með Facebook-síðu og tölvupóst eins og nánast hvert mannsbarn hér á landi þá eru líkur á að maki þinn hafi stolist til að skoða þín einkamál að þér fjarverandi.

Þetta kemur fram í nýrri breskri rannsókn sem leiðir í ljós að einn af hverjum tíu breskum karlmönnum hefur stolist inn á persónulegar síður makans til að njósna. Sex prósent kvenna höfðu gert slíkt hið sama. Ólíklegt verður að teljast að Íslendingar séu frábrugðnir Bretum að þessu leyti.

Í mörgum tilfellum reyndist makanum auðvelt að komast í upplýsingarnar því 76 prósent þeirra sem rannsóknin náði til notuðu sama lykilorðið fyrir alla sínar síður á netinu. Tuttugu prósent breskra netnotenda nota fornafn móður sinnar í lykilorðum.

Rannsóknin náði til þúsund breskra einstaklinga 18 ára og eldri.