„Mig langar til að koma heim en ég þori ekki með Ellu Dís heim,“segir Ragna Erlendsdóttir, móðir Ellu Dísar. „Við erum í stríði núna. Þeir eru búnir að lýsa yfir stríði og ég sé þetta sem stríð,“ bætir hún við. Með „þeir“ á hún við yfirvöld og þá barnalækna sem annast hafa Ellu Dís. Ragna er stödd í Bretlandi, en yfirvöld þar í landi sviptu hana forræðinu yfir dóttur sinni að hluta í síðustu viku.

Samkvæmt þeim upplýsingum sem Ragna fær frá lögfræðingi sínum í Bretlandi eru barnaverndaryfirvöld að afla sér upplýsinga um hvort hún gæti verið með sjúkdóminn Münchausen by proxy. Sem gengur út á að foreldri ýkir, skáldar, eða veldur veikindum barns síns. Aðspurð hvers vegna hún telji það vera til skoðunar segir Ragna aðallega tvo þætti skýra það.

„Af því Ella Dís var ósjúkdómsgreind í svo langan tíma og hrörnaði svo mjög hratt. Svo héldu þau fyrst að ég hefði verið í læknisfræði því ég er mjög vel að mér um þetta allt. Þau telja að af því ég er svo vel að mér í læknisfræði hafi ég gert Ellu Dís veika.“