Hraðskreiðir bílar, einkaþotur, lystisnekkjur, fáklæddar konur og dýrasta lúxusvilla Nýja-Sjálands. Þetta var einkennandi fyrir lífsstíl Kims Dotcom, 38 ára Þjóðverja, sem er stofnandi og aðaleigandi skráarskiptasíðunnar Megaupload.com.

Bandaríska alríkislögreglan, FBI, lokaði síðunni í síðustu viku en grunur leikur á að stjórnendur vefsíðunnar hafi haft um hálfan milljarð dala, eða tæplega 62 milljarða króna, af kvikmyndaframleiðendum og öðrum rétthöfum með því að dreifa efni sem var höfundarréttarvarið. Gerð var húsleit á heimili Kims og hann handtekinn í kjölfarið ásamt þremur öðrum stjórnendum vefsíðunnar.

Hann situr nú í gæsluvarðhaldi og bíður eftir að dómari taki ákvörðun um það hvort hann verði framseldur til Bandaríkjanna. Ef dómari fellst á það gæti Kim átt yfir höfði sér áratuga fangelsi í Bandaríkjunum.