Eigandi franska fyrirtækisins Poly Implant Prothese (PIP), sem framleiddi gallaðar brjóstafyllingar,var handtekinn í húsi í suður Frakklandi í gærkvöldi. Jean- Claude Mas var eigandi og forstjóri PIP fyrirtækisins og mun hafa verið handsamaður á heimili sínu í Six-Fours-les-Plages í Frakklandi.

Eins og margoft hefur komið fram í fjölmiðlum eru PIP sílíkon brjóstapúðarnir gallaðir og var iðnaðarsílikon notað til að framleiða þá. Slíkt efni er ekki heimilt til notkunar í brjóstapúða og er ekki hannað til notkunar í lækningavörur. Notkun á slíkum púðum var bönnuð í Frakklandi árið 2010 og var þrjátíu þúsund konum ráðlagt að láta fjarlægja þær.

PIP málið hefur þó ekki verið staðbundið við Frakkland heldur virðast fjölmargir læknar í Evrópu hafa notað slíka púða, einnig hér á landi eins og hefur margoft komið fram. Rúmlega fjögurhundruð íslenskar konur eru með slíka púða og hafa sex konur þegar komist að því að púðar þeirra leki.