„Þetta kemur verst niður á neytandanum því kostnaðurinn sem fylgir þessum reglum mun þýða hærra matvöruverð í landinu,“ segir Jón Gerald Sullenberger, eigandi matvöruverslunarinnar Kosts.

Ný reglugerð Jóns Bjarnasonar, sjávarútvegs- og landbúnaðarráðherra, um merkingar á erfðabreyttum matvælum tekur gildi um áramótin. Frá og með 1. janúar verður skylda að merkja matvörur sem innihalda meira en 0,9 prósent af erfðabreyttum efnum, til dæmis hveitikorn, maís eða soja. Þar á meðal eru þekktar bandarískar matvörur eins og Cheerios og Hunts-tómatsósa.

DV hafði samband við nokkra af stærstu innflytjendum bandarískra matvæla á Íslandi. Hjá Nathan og Olsen, sem flytja til dæmis inn morgunkornið vinsæla Cheerios frá General Mills, fengust þær upplýsingar að unnið væri að því að finna leiðir til að fylgja reglunum en forsvarsmaður fyrirtækisins vildi ekkert láta hafa eftir sér um málið. Hjá Innesi fengust þær upplýsingar að verið væri að fara yfir hvort vörurnar sem þeir flytja inn innihaldi erfðabreytt efni. Enn sem komið væri hefði sú ekki verið raunin en vinnu við athugunina væri ekki lokið. Hjá Aðföngum, sem flytja inn matvæli frá Ameríku fyrir Hagkaup og Bónus, fengust svipaðar upplýsingar. Mögulega þyrfti að hætta að flytja inn tilteknar vörur.

Jón Gerald, eigandi Kosts, sem flytur inn mikið af vörum frá Bandaríkjunum, segir í samtali við DV að reglurnar bitni þannig á sínum rekstri að hann hafi þurft að búa til tvö stöðugildi sem einungis muni sjá um að merkja erfðabreyttar vörur. Af orðum má ætla að margar vörur í versluninni innihaldi erfðabreytt efni. „Það vill þannig til að matvöruverð í Bandaríkjunum er 20 til 40 prósent lægra en á evrusvæðinu. Annan daginn er á Íslandi talað um hátt matvöruverð en hinn daginn eru sett lög og reglur sem munu leiða til þess eins að vörurnar munu kosta meira; með alls kyns merkingum og höftum. Það er verið að takmarka það svæði þar sem við getum fundið góðar ódýrar matvörur, eins og í Bandaríkjunum,“ segir hann við DV. Hann segir að því miður muni neytandinn á endanum þurfa að borga fyrir þessa vinnu.