Snjallsímar sem notast við Google Android-kerfið eru vinsælustu símar Bandaríkjanna. Þetta sýna tölur sem markaðsfyrirtækið Nielsen tók saman yfir sölutölur farsíma frá byrjun júnímánaðar til loka ágúst.

Samkvæmt þeim tölum keyptu 56 prósent Bandaríkjamanna farsíma sem notast við Android. 28 prósent keyptu hins vegar iPhone-snjallsíma. Don Kellogg, einn forsvarsmanna fyrirtækisins, segir þó að viðbúið sé að tölurnar muni breytast þegar iPhone 5 kemur á markað, líklega í næsta mánuði.