Styrmir Bragason, einn þremenninganna sem var sýknaður í Héraðsdómi Reykjavíkur í Exeter-málinu í dag, segir að niðurstaða dómsins hafi ekki komið honum á óvart. „Niðurstaða dómsins kemur mér ekki á óvart. Ég átti í raun aldrei von öðru en þessari niðurstöðu,“ segir Styrmir.

Styrmir, sem var ákærður fyrir umboðssvik og peningaþvætti, segir að hann hafi aldrei skilið ákæruna á hendur sér. „Ég hef í raun aldrei skilið ákæruna á hendur mér í þessu máli... Dómurinn er einróma í málinu hvað varðar sýknuna á hendur mér - það voru þrír dómarar í málinu.“

Aðspurður segist Styrmir ekki hafa velt fyrir því fyrir sér hvort hann ætli að leita réttar síns út af málaferlunum, fara í skaðabótamál eða eitthvað slíkt. „Nei, ég hef ekkert spáð í því.“

Ekki liggur fyrir hvort ákæruvaldið muni áfrýja dómi Héraðsdóms Reykjavíkur til Hæstaréttar Íslands.