„Ég hef ekki hugmynd um það,“ segir Ragnar Z. Guðjónsson aðspurður um hvort hann búist við því að þurfa að verjast málinu gegn sér fyrir Hæstarétti eftir að hann var sýknaður af kröfum ákæruvaldsins í Exeter málinu svokallaða í dag. Farið var fram á fimm ára fangelsi í málinu af hálfu ákæruvaldsins. Ragnar var ákærður fyrir umboðssvik ásamt þeim Styrmi Þór Bragasyni og Jóni Þorsteini Jónssyni. Þeir voru allir sýknaði í Héraðsdómi í dag.

Ragnar var ekki viðstaddur þegar dómurinn var kveðinn upp klukkan 11 í dag í Héraðsdómi Reykjavíkur. „Ég hef ekkert um málið að segja að svo stöddu,“ segir Ragnar aðspurður um hvað honum þætti um dóminn sem féll honum í hag og bætti því við að hann hefði ekki séð dóminn sjálfan. Hann játaði því samt sem áður að um væri að ræða jákvæða niðurstöðu fyrir sína hönd.