26,7 prósent landsmanna segjast bera lítið traust til Landlæknisembættisins, samkvæmt nýrri könnun MMR. Könnunin var framkvæmd dagana 9. til 15. júní og var heildarfjöldi svarenda 867 einstaklingar.

Af þeim sem tóku afstöðu sögðust 32,3 prósent bera mikið traust til embættisins, 25 prósent sögðust bera frekar mikið traust og 7,3 prósent sögðust bera mjög mikið traust til til embættisins. Þá sögðust 41,1 prósent af þeim sem tóku afstöðu hvorki bera mikið né lítið traust til embættisins, 17,2 prósent sögðust bera frekar lítið traust og 9,5 prósent sögðust bera mjög lítið traust til Landlæknisembættisins.

Í tilkynningu frá MMR kemur fram að nokkur munur hafi verið á afstöðu eftir aldri, menntun, starfstétt og tekjum. Af þeim sem tóku afstöðu voru 30,5 prósent þeirra sem voru í aldurshópnum 50 til 67 ára sem sögðust bera lítið traust til
embættisins borið saman við 21,2 prósent þeirra sem voru í aldurshópnum 18 til 29 ára.

Þá voru 18,7 prósent sérfræðinga sem tóku afstöðu sem sögðust bera lítið traust til Landlæknisembættisins borið saman við 38 prósent iðnarmanna. Af þeim sem tóku afstöðu sögðust 21,1 prósent sem hafa hæstu tekjurnar (800 þúsund eða hærra) bera lítið traust til embættisins borið saman við 32 prósent þeirra sem eru með 250 til 399 þúsund í heimilistekjur á mánuði.