Marta Dögg Sigurðardóttir formaður Félags leikskólakennara gerði nokkrar alvarlegar athugasemdir við fyrirhugaðar tillögur um samrekstur og sameingu leikskóla, grunnskóla og frístundaheimila í Reykjavík, á samráðs- og kynningarfundi sem haldinn var í Ráðhúsi Reykjavíkur síðastliðinn mánudag. Tillögurnar koma frá starfshópi sem farið hefur yfir málefni bæði leik- og grunnskóla í borginni.

Marta gerði einnig athugasemdir við þær rannsóknir sem Oddný Sturludóttir, formaður menntaráðs Reykjavíkurborgar, hefur vísað til í málflutningi sínum um hagræðingu í leik- og grunnskólamálum. Eftir að Jóna Rósa Stefánsdóttir, varaformaður Félags leikskólakennara, sem einnig sat fundinn, fór þess á leit við Oddnýju að hún vísaði á þessar rannsóknir þá kom í ljós að um er að ræða könnun vegna mastersritgerðar Óskars Sandholt, verkefnastjóra starfshópsins, á áhrifum sameiningar nokkurra fámennra grunnskóla á landsbyggðinni. Þetta kemur fram í frétt á vef Félags leikskólakennara.

„Könnunin tekur eingöngu til sameiningar grunnskóla, en hvergi er minnst á samrekstur ólíkra skólastiga eða sameiningu tveggja leikskóla. Þar utan er úrtakið sem könnunin tekur til svo lítið að hæpið er að byggja jafn víðtækar og afdrifaríkar breytingar og um ræðir á niðurstöðum könnunarinnar,“ segir í fréttinni.

Mikillar óánægju gætir á meðal leikskólastarfsmanna vegna fyrirhugaðrar sameiningar og fólk innan stéttarinnar hefur sagt að allt logi af ónægju. Þá hefur verið bent á að enginn ávinningur sé af því að missa fagfólk úr stéttinni vegna hagræðingar, en það muni óhjákvæmilega gerast.

Það mun koma í ljós í lok febrúar hvaða leikskólar verða sameinaðir og hvort grunnskólar og frístundaheimili sameinist einnig. Þangað til upplifa tugir leikskólastarfsmanna mikla óvissu um framtíð sína og starfsöryggi.