Daginn áður en að Kaupþing banki féll voru 92 prósent af eignasafni eigin viðskipta bankans bréf í bankanum sjálfum. Síðustu fimm mánuðina fyrir fall bankans keypti bankinn sjálfur allt að 75 prósent af öllum hlutabréfum í bankanum sem voru til sölu í hverjum mánuði. Þetta kemur fram í úttekt Kastljóss sem var kynnt í kvöldfréttatíma Ríkissjónvarpsins.

Í úttektinni er vitnað í kæru Fjármálaeftirlitsins til embættis sérstaks saksóknara. Þar kemur fram að á tímabilinu júní til október árið 2008, árið sem bankinn féll, hafi viðskipti bankans með hlutabréf í sjálfum sér verið á bilinu 60 til 75 prósent af heildarkaupum í Kauphöllinni, í hverjum mánuði.

Samkvæmt Ríkissjónvarpinu var stöðu bankans í eigin bréfum leynt fyrir stjórninni með því að falsa skýrslur þar sem staðan átti að koma fram.