Heiðarleg tilraun Andrews Jernigans til að gefa rafmagnslausri bifreið félaga síns start fór hrikalega úrskeiðis á dögunum. Það er ekki sama hvernig startkaplarnir eru tengdir við rafgeymana og verður til dæmis að passa að tengja plús við plús eins og flestir bílaáhugamenn þekkja.

Andrew og félaga hans að nafni Delaney Mills tókst hins vegar að klúðra þessu öllu eins og sést á meðfylgjandi mynd. Eldur kom upp í báðum bílunum og skemmdust þær báðar mikið. Það tók slökkviliðið um fimmtán mínútur að koma á staðinn og var litlu hægt að bjarga.

Af þessu tilefni er ágætt að fræða lesendur um það hvernig á að gefa start. DV fjallaði um það vorið 2010 og vísaði í blað FÍB:

Rafgeymar lifa ekki endalaust og þeir geta verið orðnir lélegir eftir veturinn. Þá getur það gerst að bíllinn fer ekki í gang. Í nýju blaði FÍB er útskýrt hvernig farið skal að, þegar gefa þarf bíl start. Gætið þess vandlega að tengja plús (merkt á geyminum) við plús á hinum geyminum.

Takið eftir: Mesta hættan á því að skemma rafkerfin í bílunum við straumgjöf skapast þegar aftengja skal startkaplana. Þegar bíllinn með tóma geyminn er kominn í gang skulu startkaplarnir vera tengdir um stund til að jafna út spennumismuninn milli tóma og fulla geymisins. Þetta skal gera til að forðast að neisti og yfirspenna hlaupi út í „galopið“ rafkerfið eftir að búið er að gefa straum og skemmi eða eyðileggi rafeindabúnað annars eða beggja bílanna.