Mælir með því að hella konur fullar og einangra þær

Gefur út sjálfshjálparbók um skyndikynni með íslenskum konum

Mynd: Mynd: Skjáskot af vefnum www.rooshv.com

„Ég mun beita þessum aðferðum þegar ég sný aftur til landsins í þessum mánuði,“ segir einn notandi á umræðuþræði vefsíðu rithöfundarins Roosh Vörek þar sem spjallverjar tjá sig um bókina Bang Iceland: How To Have Sex With Icelandic Women in Iceland.

Eins og komið hefur fram fjallar bókin um það hvernig best sé fyrir ferðamenn að sænga hjá íslenskum konum sem Vörek lýsir sem „lauslátum yfir meðallagi.“

Fjölmargir notendur gefa bókinni fína umsögn á spjallborðinu og deila reynslu sinni af landi og kvenþjóð.

Einn notandi er afar forvitinn um íslenska samfaramenningu og segist hafa heyrt af því að íslenskar konur væru framhleypnar og ágengar í kynferðismálum og að „hvergi væri auðveldara að fá drátt en þar.“

Hann spyr þá sem lesið hafa bókina hvort Vörek komist að sömu niðurstöðu. „Ef það er satt hefði ég ekkert á móti því að eyða viku þar til að hamast á hvítum tíkum.“

Annar spjallverji segir að allir sem ætli að ferðast til Íslands verði að lesa bókina og hún sé mikilvæg fyrir „undirbúningsvinnuna“ fyrir heimsókn.

Ótrúlega lauslátar- lykillinn að hella þær fullar og einangra

Í útdráttum sem Vörek birtir úr Bang Iceland-bókinni má lesa að honum þyki íslenskar konur ótrúlega lauslátar „þegar búið er að hella þær fullar og einangra þær.“

„Þökk sé dásamlegu samspili femínisma og þrá íslenskra kvenna nota áfengi til að drekka sig í algleymi munt þú komast að því að skyndimökin eru fljót að gerast, oft innan klukkustundar. Að vísu getur reynst erfitt að brjótast í gegnum skel íslenskra kvenna þar sem þær eru lokaðar og skeptískar, en þegar þú kemst „inn“ hjá þeim þá munt þú koma þeim í bólið á mettíma. Ísland er eina vestræna ríkið sem ég veit um þar sem umsvifalaust kynlíf er mögulegt án þess að greiða fyrir það,“ skrifar Vörek í bók sinni.

Höfundurinn hefur skrifað sambærilegar „sjálfshjálparbækur“ um Argentínu, Brasilíu og Kólumbíu en sjálfur segist hann hafa alist upp í Maryland í Bandaríkjunum. Hann hefur þá gefið út tvær aðrar bækur Bang og Day Bang þar sem hann ráðleggur mönnum, sem fyrr, hvernig best sé að ná sér í einnar nætur gaman almennt.

Gegnumgangandi þema í bókum Vöreks virðist vera kvenfyrirlitning þar sem kynlíf er gert að leik kattarins að músinni og hafa skrif hans vakið litla hrifningu kvenna og kvenréttindafólks.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.