„Þetta eru starfsmenn úr báðum bönkum, það koma tæplega tveir þriðju úr Byr og restin úr Íslandsbanka,“ segir Guðný Helga Herbertsdóttir, upplýsingafulltrúi Íslandsbanka, um uppsagnirnar sem tilkynnt var um fyrr í dag. „Þetta er úr flestum deildum bankans. Þetta dreifist yfir allan bankann.“ Guðný segir að engir framkvæmdastjórar séu í hópnum en forstöðumenn séu meðal þeirra sem sagt var upp.

Guðný segir að endurskipulagningu í höfuðstöðvum bankans sé lokið með aðgerðum dagsins en hún segir að fleiri eigi von á uppsagnarbréfi eftir áramótin þegar ráðist verður í sameiningu útibúa. „Það er bara unnið að sameiningu útibúanna og það er búið að tilkynna starfsmönnum með hvað hætti það verður gert,“ segir hún en ráðist verður í endurskipulagningu vegna sameiningu útibúanna um áramótin.

Eins og kom fram í tilkynningu frá Íslandsbanka vegna uppsagnanna eru aðgerðirnar „nauðsynlegar til að tryggja að kostnaður bankans sé í samræmi við umsvif, arðsemiskröfur, og starfsumhverfi á íslenskum fjármálamarkaði“. Íslandsbanki skilaði 29,4 milljarða króna hagnaði á síðasta ári en Guðný Helga segir að það sé ekki hægt að horfa á þær tölur.

„Skattaumhverfi og annað hefur breyst. Það er verið að tala um að leggja á sérstakan launaskatt á fjármálafyrirtæki og bankasýslan og aðrir eigendur gera ákveðna arðsemiskröfur á bankann,“ segir hún og nefnir að um helmingur hagnaðar síðasta árs hafi verið vegna endurmats á lánasafni bankans. „Þetta er mjög erfitt og erfiður dagur fyrir starfsfólkið að kveðja samstarfsfélaga sína.“