Grænmetisfyrirtækið Nýrækt ehf. er gjaldþrota eftir að hafa tekið gríðarleg lán fyrir hlutabréfum í íslensku bönkunum. Fyrirtækið er meðal þeirra sem minnst var á í rannsóknarskýrslu Alþingis vegna bankahrunsins og eru viðskipti félagsins meðal þess sem til rannsóknar hefur verið hjá sérstökum saksóknara.

Kröfur í þrotabú félagsins námu 5,7 milljörðum króna. Arion banki var langstærsti kröfuhafinn í Nýrækt þegar það var tekið til gjaldþrotaskipta. 99 prósent krafna í búið voru frá bankanum.

Gunnar Ingi Jóhannsson, lögmaður og skiptastjóri Nýræktar, vildi ekki staðfesta við DV að gögn hefðu verið send úr þrotabúinu til ákæruvaldsins eða sérstaks saksóknara. „Ég get ekkert tjáð mig um það,“ sagði hann. Engar eignir voru til í félaginu og er því líklegt að milljarðarnir sem Kaupþing lánaði Nýrækt verði afskrifaðir.