Fjármálaeftirlitið hefur kært þá niðurstöðu embættis sérstaks saksóknara að hætta rannsókn á fjárfestingum fimm lífeyrissjóða, sem voru í eignastýringu hjá gamla Landsbankanum, til embættis ríkissaksóknara. Þetta kemur fram í svari frá embætti sérstaks saksóknara við fyrirspurn DV um málið: „Ákvörðun embættis sérstaks saksóknara um að hætta rannsókn þess máls sem þú vísar til hefur verið kærð af hálfu FME til Ríkissaksóknara.“

Upplýsingagjöf talið ábótavant
Í lok september sendi Landsbankinn, arftaki gamla Landsbankans, frá sér fréttatilkynningu um að rannsókninni á málinu hefði verið hætt hjá sérstökum saksóknara. Fjármálaeftirlitið hefur nú tekið þá ákvörðun að kæra þessa niðurstöðu.

Líkt og fram kom í fréttatilkynningu Landsbankans var tilgangur rannsóknarinnar að kanna „… hvort stjórnendur og starfsmenn þeirra lífeyrissjóða sem til skoðunar voru, hafi á fyrri hluta árs 2008 farið út fyrir lagaramma um fjárfestingarákvarðanir og hvort upplýsingagjöf þar að lútandi til FME hafi verið ábótavant.“ Fjármálaeftirlitið hóf rannsóknina á málinu og sendi kæru til sérstaks saksóknara. Rannsóknin hafði staðið í á þriðja ár þegar henni var hætt...