Þrátt fyrir að margir hafi orðið fyrir vonbrigðum að Apple tilkynnti ekki um iPhone 5-síma á síðasta blaðamannafundi sínum heldur uppfærslu á iPhone 4, iPhone 4S, eru margir spenntir fyrir símanum. Það tók aðeins 12 klukkustundir að selja alla iPhone 4S-símana sem Apple bauð í forsölu. Þetta kemur fram á vef International Business Times.

Bandaríska símfyrirtækið AT&T , sem er meðal samstarfsfyrirtækja Apple um sölu og þjónustu við iPhone-síma í Bandaríkjunum, tók eitt og sér við meira en 200 þúsund pöntunum. Fjöldi manns hefur þá komið sér fyrir í röð fyrir utan Apple-búðina í New York í Bandaríkjunum þar sem þeir bíða eftir að geta keypt nýja símann.

Allar þessar pantanir á iPhone 4S þyða að nýja útgáfan er ein sú vinsælasta frá því að fyrsti iPhone-síminn kom á markað.