Microsoft hefur fengið grænt ljós frá samkeppnisyfirvöldum Evrópusambandsins um að kaupa netsímfélagið Skype. Microsoft gerði 8,5 milljarða dala skuldbindandi tilboð í Skype fyrir nokkru síðan en bíða þurfti samþykkti samkeppnisyfirvalda áður en kaupin gátu gengið í gegn.

Skype býður upp á eitt vinsælasta netsímaforrit á markaðnum í dag en milljónir manna nota forrit fyrirtækisins til að tala sín á milli, endurgjaldslaust, í gegnum netið. Með kaupunum hefur Microsoft styrkt stöðu sína sem leiðandi afl á sviði tækniþróunar en fyrirtækið hefur í raun keypt margra ára þekkingu starfsmanna Skype.

Skype verður gert að sérstakri deild innan Microsoft sem hefur átt undir högg að sækja í samkeppni sinni við Google og önnur fyrirtæki. Vonast stjórnendur Microsoft væntanlega að með kaupunum nái Microsoft aftur öruggri forystu.