Mikill meirihluti landsmanna er andvígur því að sett verði veggjöld til að fjármagna nýframkvæmdir í samgöngumálum. Þetta er samkvæmt niðurstöðu könnunar MMR á afstöðu almennings.

890 manns svöruðu könnuninni sem framkvæmd var dagana 11. til 14. janúar. Mikill meirihluti, eða 82 prósent, sagðist andvígur veggjöldum. Lítill munur reyndist á afstöðu fólks eftir því hvort það býr á höfuðborgarsvæðinu eða úti á landi.

Andstaðan við veggjöld reyndist mest á meðal sjálfstæðismanna, en tæplega 89 prósent þeirra sgöðust frekar eða mjög andvígir hugmyndum um veggjöld.