Yfirvöld í Jóhannesarborg í Suður-Afríku reyna nú að byggja hreinsistöðvar áður en gríðarlega mikið magn af menguðu námuvatni flæðir upp á götur borgarinnar. Yfirgefnar námur í og við borgina hafa fyllst af grunnvatni sem mengast af snertingu við málmana í námunum.

Þegar það rís mun vatnið, sem hefur sama sýrustig og edik, hugsanlega leiða til smáskjálfta og rafmagnsleysis og valda krabbameini á meðal íbúa borgarinnar. Eitt og hálft ár mun líða áður en vatnið kemst upp á yfirborðið og borgaryfirvöld þurfa að bregðast við í tæka tíð.