„Fyrst kynhneigð forsætisráðherra er svona mikið atriði í Færeyjum að þá vonum við bara það að sú staðreynd að hún hafi verið þarna sem forsætisráðherra Íslands ásamt eiginkonu sinni hafi verið stuðningur við samkynhneigða í Færeyjum,“ segir Árni Svanur Daníelsson, prestur og upplýsingafulltrúi Biskupsstofu.

Jenis av Rana vildi ekki taka þátt í kvöldverðarboði sem lögmaður færeyja hélt til heiðurs Jóhönnu Sigurðardóttur forsætisráðherra þar sem Jóhanna sé samkynhneigð. Árni segir að það sé ljóst að tilvitnanir Jenisar í biblíuna yrðu ekki notaðar gegn samkynhneigðum í þjóðkirkjunni á Íslandi í dag.

„Í gegnum niðurstöðu kenningarnefndar kirkjunnar, sem fjölluðu um þessa texta og fleira, er það afstaða kirkjunnar að þeir eigi ekki við í dag. Þeir fjalla um fornan átrúnað en að þeir eiga ekki við um samkynhneigð í samtímanum og þeir eiga ekki við um samvist eða hjónaband samkynhneigðra,“ segir Árni.