Páll Gunnar Jónsson, forstjóri samkeppniseftirlitsins segir að verð á innfluttri matvöru verði til skoðunar hjá eftirlitinu. Þrátt fyrir mikla styrkingu krónunnar hefur verð á innfluttri matvöru haldist óbreytt, en Páll segir að þetta geti verið afleiðing lítils hagkerfis.

„Við erum alltaf með matvælamarkaðinn til skoðunar. Þetta getur verið ein af vísbendingum um fákeppnisaðstæður, sem að oft fylgja litlum hagkerfum eins og okkar.“ Sagði Páll í fréttum RÚV í kvöld.

Samkvæmt fréttastofu RÚV hafa verslunarmenn lofað því að gengisstyrkingin skili sér í lægra verði á innfluttum mat og drykk. En gengið hefur verið að styrkjast statt og stöðugt á árinu, og þrátt fyrir það bólar ekki á lækkun.