Laganemar háskólanna höfðu fyllt öll sæti í dómssal Hæstaréttar þegar mál um hvaða vextir gengistryggð lán eiga að bera var tekið fyrir í morgun. Fulltrúar fjölmiðla komust ekki fyrir í salnum en salnum hafði verið lokað þegar þá bar að dyrum og þeim ekki hleypt inn.

Málflutningur í málinu fer fram í dag og er úrskurðar að vænta eftir hálfan mánuð. Gert er ráð fyrir því að málflutningurinn í dag taki um þrjá tíma og verði lokið í kringum hádegi.

Héraðsdómur Reykjavíkur úrskurðaði fyrr í sumar að gengistryggðu lánin ættu að bera óverðtryggða vexti Seðlabanka Íslands. Það er í samræmi við tilmæli Seðlabanka Íslands og Fjármálaeftirlitsins sem send voru til fjármálafyrirtækja í sumar.

Málið hefur vakið mikla athygli og var strax ljóst þegar málið var tekið fyrir í Héraðsdómi að því yrði áfrýjað til Hæstaréttar, sama hvaða niðurstaða fengist þá í málið.