Ríkissaksóknari hefur ákært Ingólf Kjartansson, fyrrverandi skólastjóra Grunnskólans á Tálknafirði, fyrir fjárdrátt. Hann er ákærður fyrir að stinga í eigin vasa styrk sem grunnskólinn fékk frá norrænum samtökum. Styrkurinn átti að renna til barna í grunnskólanum svo þau gætu farið í skólabúðir í Finnlandi. Hann hefur þegar endurgreitt alla upphæðina.

Upp komst um fjárdrátt Ingólfs eftir að starf hans var lagt niður á síðasta ári. Málið snýst um styrk sem skólinn fékk frá samtökunum Nordplus upp á 1,5 milljónir króna. Ingólfur hafði umsjón með verkefninu fyrir hönd skólans og var styrknum ætlað að fjármagna heimsókn grunnskólabarna í skólabúðir í Finnlandi.

Samkvæmt upplýsingum DV hefur Ingólfur þegar endurgreitt Tálknafjarðarhreppi alla upphæðina. Ekki liggur hins vegar fyrir í hvað Ingólfur notaði peningana en heimildir DV herma að fyrstu millifærslurnar hafi verið hugsaðar sem lán sem yrði greitt til baka skömmu síðar.