Krafan vegna lánsins sem kallað var „síðasta lánið undir sólinni sem ætti að afskrifa“ er komin til gamla Landsbankans frá Arion banka. Björgólfur og faðir hans voru í sjálfsskuldarábyrgð fyrir láninu sem stendur í sex milljörðum króna. Arion banki og Landsbankinn skiptu á kröfu á hendur Björgólfi og Exista til að bæta stöðu sína í skuldauppgjöri og nauðasamningum þessara tveggja aðila.
Bankar skiptust á lánum
Sex milljarða króna krafa Arion banka á hendur Björgólfi Thor Björgólfssyni, fjárfesti og fyrrverandi eiganda Landsbankans, er komin í eigu gamla Landsbankans, samkvæmt heimildum DV. Krafan er tilkomin vegna láns sem tekið var árið 2005 vegna fjárfestinga í félaginu Samson Properties. Björgólfur Thor er í sjálfskuldarábyrgð fyrir láninu. Skilanefnd Landsbankans sér því nú um innheimtu kröfunnar.
Lán þetta er orðið frægt þar sem greint var frá því, fyrst eftir að sagt var frá því í fjölmiðlum í fyrra, að lánið hefði verið tekið í Búnaðarbankanum til að kaupa Landsbankann árið 2002. Síðar kom í ljós að um annað lán væri að ræða. Þeir Björgólfsfeðgar voru báðir í sjálfskuldarábyrgð fyrir láninu en þar sem Björgólfur Guðmundsson hefur verið úrskurðaður gjaldþrota hvílir krafan á Björgólfi Thor einum.
DV leitaði eftir staðfestingu á kröfuskiptunum hjá Ragnhildi Sverrisdóttur, talsmanni Björgólfs Thors. Svar Ragnhildar var á þá leið að hún gæti ekki tjáð sig um málið: „Björgólfur Thor er bundinn trúnaði við kröfuhafa sína og getur ekki tjáð sig um einstök atriði skuldauppgjörs síns.“
Hemmi Gunn fallinn frá