Formaður Prestafélags Íslands, Guðbjörg Jóhannesdóttir, segir Karl Sigurbjörnsson biskup þurfa að leita stuðnings hjá preststéttinni og þjóðinni um áframhaldandi setu sem biskup. Guðbjörg sagði í kvöldfréttum Ríkissjónvarpsins að Þjóðkirkjan þyrfti að taka vel á þeim þremur málum sem snúa að Ólafi Skúlasyni biskup en hún sagði kirkjuna eiga langt eftir í að endurbyggja traust sitt hjá þjóðinni.

Hún sagði að ekki hefði tekist að taka almennilega á þessum málum eftir að nýr biskup tók við af Ólafi Skúlasyni og að það sé sýnt að stjórnsýsla kirkjunnar hefur brugðist.