Þýskur bankaræningi leiddi lögreglu beint í fangið á sér eftir að hafa ögrað lögreglu með tölvupósti. Lögregla í þýsku borginni Wuerzburg segist hafa handtekið þennan nítján ára gamla bankaræningja á miðvikudag eftir að hann hafði sent lögreglu og dagblöðum tölvupóst þar sem hann benti á villur í fréttum af bankaráni hans í Roettingen fyrir viku.

Þýska dagblaðið Bild segir ræningjann hafa hæðst að lögreglunni fyrir að hafa aldur hans, hæð og hreim rangan og sagðist einnig hafa komist undan í bíl, ekki hlaupandi.

Lögreglan rakti tölvupóstinn og handtók hann í veðmálahöll í Hamborg nokkrum klukkutímum seinna.