„Ég er ósáttur við að vera settur undir sama hatt og þeir, sem stunduðu endalausa hringekju eigna sín á milli með skuldsettum yfirtöku. Þeir sköpuðu aldrei nein verðmæti í raun, heldur hækkuðu bara verð á pappírum,“ skrifar Björgólfur Thor Björgólfsson á nýja vefsíðu sína, btb.is, þar sem hann segir afdráttarlaust að hann sé ekki einn af þeim sem hingað til hafa verið taldir til hinna íslensku útrásarvíkinga.

„Slík viðskipti hef ég ekki stundað. Ég flutti beinharða peninga inn í landið frá arðbærum fjárfestingum erlendis. Flæði peninga inn í landið fyrir mína tilstuðlan var sambærileg því flæði peninga úr landi, sem margir aðrir viðskiptamenn töldu sér sæmandi,“ skrifar Björgólfur.