Bandaríkjamaðurinn Charlie Wittmack, 36 ára, ætlar að reyna við einhverja erfiðustu líkamlegu áskorun sem um getur. Hann ætlar að synda niður Thamesánna í Lundúnum, út á Ermasundið og yfir það til Frakklands. Og það er aðeins blábyrjunin á þríþrautinni!

Wittmack ætlar því næst að hjóla til Kalkútta á Indlandi, vegalengdin er um 8000 kílómetrar. Næst ætlar hann að hlaupa alla leið upp á tind Everestfjalls.

Wittmack ætlar að vera kominn til landamæra Kína og Kirgistan í lok október og fara þaðan upp á tind Everest hinn 25. maí á næsta ári.

Hann syndir nú í Thames og nær tíu til tuttugu kílómetrum á dag. „Stundum syndi ég reyndar ekki, heldur geng, því fljótið er svo grunnt. Það er frekar sárt því ég stíg oft á grjóthnullunga,“ segir Charlie Wittmack.

Wittmack er vanur maður. Hann hefur áður synt yfir Ermarsundið og klifið Everest. Hann starfar sem lögmaður í Iowafylki í Bandaríkjunum.