Borgarstjóri og Orkuveitan sökuð um að leyna upplýsingum

Sigrún Elsa Smáradóttir, fulltrúi Samfylkingar í stjórn Orkuveitu Reykjavíkur, segir í samtali við DV að

ítrekað hafi verið beðið um upplýsingar varðandi gjaldskrárhækkanir hjá Orkuveitu Reykjavíkur en við því hafi engin svör borist. Hún segir að Hanna Birna Kristjánsdóttir, fráfarandi borgarstjóri, hafi leynt upplýsingum um fyrirséðar gjaldskrárhækkanir fram yfir kosningar.

„Annað hvort hefur borgarstjóri ekki látið framkvæma þessa vinnu sem væri mjög ámælisvert eða hún hefur lagt upplýsingarnar til hliðar, hvort heldur sem er þá hefur upplýsingum um yfirvofandi gjaldskrárhækkanir verið haldið frá borgarbúum fram yfir kosningar,“ segir Sigrún Elsa í samtali við DV.

Hún segir útreikningana ekki flókna, og því hefði ekki þurft að taka svo langan tíma að birta upplýsingarnar. Fulltrúar Samfylkingarinnar í borginni lögðu fram fyrirspurn um hversu mikið gjaldskrár fyrirtækisins þurfi að hækka ef bættri afkomu Orkuveitunnar yrði einungis mætt með gjaldskrárhækkunum. Fyrirspurninni var ekki svarar fyrr en nú eftir kosningar, þrátt fyrir að hún hafi verið lögð fram í borgarráði í lok janúar.

Hún segir borgarfulltrúa lengi hafa staðið í þeirri trú að svör færu að berast, fyrirspurnin hafi verið ítrekuð við stjórn Orkuveitunnar en ekkert hafi gerst fyrr en nú daginn eftir kosningar. Svarið frá Orkuveitunni er dagsett 31. maí, daginn eftir borgarstjórnarkosningar. „Ég held að það geti ekki verið tilviljun,“ segir hún.

Hækkanir stóðu ekki til í janúar

DV fjallaði um mögulegar gjaldskrárhækkanir þann 11. janúar síðastliðinn. „Gjaldskráin okkar er tiltölulega lág og hún hefur ekki hækkað í mörg ár. Við reynum að þrauka eins og hægt er og láta borgarana njóta lágrar gjaldskrár. Svo lengi sem það er hægt látum við þá njóta þess,“ sagði Hjörleifur Kvaran, forstjóri Orkuveitunnar í samtali við DV.

Hjörleifur forstjóri sagði þá að hækkanir væru ekki framundan, í bili. „Við munum reyna að bjarga okkur sjálf. Til að standa undir íslenskum vöxtum þyrfti gjaldskráin okkar að vera miklu, miklu hærri. Sú staðreynd að við leituðum lána út fyrir landsteinana hefur skilað lægri gjaldskrá. Nú hefur skuldastaða okkar hins vegar tvöfaldast vegna gengisfalls krónunnar og ljóst að fall krónunnar hefur leikið okkur grátt,“ sagði Hjörleifur.

Orkuveita Reykjavíkur skuldar rúma tvö hundruð milljarða í erlendri mynt og gengisfall krónunnar hefur komið illa niður á fyrirtækinu. Áhættusækni Orkuveitunnar er gagnrýnd þar sem óþarfi sé fyrir fyrirtæki í almenningseign að stunda áhættufjárfestingar. Eftir bankahrunið og efnahagskreppu landsins hafa skuldir Orkuveitu Reykjavíkur hækkað gífurlega og er langstærstur hluti þeirra, eða nærri níutíu prósent, í erlendri mynt á meðan innan við tuttugu prósent af tekjum fyrirtækisins eru í erlendri mynt.

Skuldirnar eru rúmir tvöhundruð og þrjátíu milljarðar króna og lánshæfismat Orkuveitunnar er komið niður á botn. Á meðan ekki er útlit fyrir styrkingu krónunnar blasa við erfiðleikar endurfjármögnunar og talsverð hætta á því að Reykjavíkurborg neyðist til að auka eigið fé fyrirtækisins til að bjarga framtíð fyrirtækisins eða að fyrirtækið neyðist til að hækka orkuverð til neytenda.