Munaðarlíf íslensku útrásarvíkinganna og auðmannanna lýsir siðferði óhófs, flottræfilsháttar og drambs, sem gengur gegn þeim gildum sem einkenndu íslenskt samfélag á 20. öld, að mati siðfræðinefndar rannsóknarnefndar Alþingis. Nefndin fjallar í einum kafla sérstakelga um lúxuslíf hinnar nýju auðstéttar sem varð til á Íslandi um og eftir síðustu aldamót. Í skýrslunni er farið mjög hörðum orðum um lífstíl nýríkra auðmanna.

Nefndin tekur sérstaklega dæmi af því þegar Ólafur Ólafsson eigandi Samskipa réði björgunarsveit til þess að gæta þess að enginn óviðkomandi kæmist inn í veislu sem hann hélt í tilefni af fimmtugsafmæli sínu. „Af öllu þessu sést að hin nýja auðmannastétt barst mikið á og sett voru viðmið um lífsstíl sem ekki hafði þekkst hér áður. Í litlu samfélagi var óhjákvæmilegt að þessi lífsstíll hefði áhrif langt út fyrir raðir þeirra ríkustu,“ segir í skýrslu siðfræðinefndarinnar.