Magnús Guðmundsson, fyrrverandi forstjóri Kaupþings í Lúxemborg, hefur verið úrskurðaður í farbann til tveggja vikna og er því laus úr gæsluvarðhaldi. Héraðsdómur Reykjavíkur ákvað þetta nú fyrir stundu.

Magnús Guðmundsson var úrskurðaður í vikulangt gæsluvarðhald af Héraðsdómi Reykjavíkur fyrir viku síðan, úrskurðinn staðfesti Hæstiréttur síðan á mánudaginn var. Gæsluvarðhald yfir Magnúsi hefði runnið út í dag klukkan 16.

Magnús og Hreiðar Már Sigurðsson, fyrrverandi forstjóri Kaupþings, eru báðir grunaðir um umfangsmikla, kerfisbundna og skipulagða markaðsmisnotkun í starfi sínu fyrir Kaupþing á árunum fyrir hrun. Þeir voru báðir handteknir á fimmtudaginn í síðustu viku.

Hreiðar var á föstudaginn í síðustu viku úrskurðaður í tólf daga gæsluvarðhald sem rennur úr á miðvikudaginn í næstu viku.

Fyrr í dag staðfesti Hæstiréttur gæsluvarðhaldsúrskurð yfir Ingólfi Helgasyni, fyrrverandi forstjóra Kaupþings á Íslandi eftir að héraðsdómur hafði úrskurðað hann í vikulangt gæsluvarðhald á þriðjudaginn síðastliðinn.

Sjá einnig:

Ólafur Þór: Ekki þörf á áframhaldandi gæsluvarðhaldi