Samkvæmt gæsluvarðhaldsúrskurði Hæstaréttar taldi embætti sérstaks saksóknara Hreiðar Má Sigurðsson líklegan til að torvelda rannsókn málsins og því var farið fram á gæsluvarðhald yfir honum.

Viðskiptablaðið fjallar um gæsluvarðhaldsúrskurðinn á vef sínum í dag og hefur hann undir höndum þrátt fyrir að um lokað þinghald hafi verið að ræða vegna rannsóknarhagsmuna.

Tekið er fram í úrskurði Hæstaréttar að framburður Hreiðars sé að „ýmsu leyti ekki í samræmi við framburð annarra sem þegar hafa gefið skýrslu við rannsókn málsins.“ Fleiri eigi þá eftir að gefa skýrslur, bæði vitni og eftir atvikum sakborningar.

Hreiðar Már er samkvæmt gæsluvarðhaldsbeiðni sérstaks saksóknara grunaður um fjölmörg brot sem fangelsisrefsing liggur við. Eiga þau að hafa verið framin á árunum 2005 til og með 2008.

Að venju skilaði Jón Steinar Gunnlaugsson hæstaréttardómari sérákvæði og taldi að Hreiðar hefði engin gögn sem gætu torveldað rannsókn málsins. Hann væri hins vegar sammála forsendum og niðurstöðu meirihluta dómara um að ekki væri efni til að fallast á kröfu verjenda Hreiðars um ómerkingu gæsluvarðhaldsúrskurðarins.