Rétt fyrir klukkan eitt í nótt varð örlítil aukning á vatnsrennsli í Markarfljóti og barst nokkur krapi með. Þegar leið að morgni hafði vatnsmagn ekki aukist frekar í ánni. Nóttin hefur að öðru leyti verið mjög róleg á gossvæðinu. Frá eldstöðvunum má þó enn finna markvissan takt umbrotanna, að því er segir í tilkynningu frá almannavörnum.

Vetur og sumar frusu saman undir Eyjafjöllum og er nú mikill snjór og hálka á veginum austan við Markarfljót. Má í dag búast við öskufalli í grennd við eldstöðina og vestur af henni.

Í tilefni sumardagsins fyrsta verður í dag opið hús og veisla í Heimalandi frá klukkan 11-17.
Verða veitingar í boði SS, Emmess ís og Ölgerðarinnar. Rangárvallasýsludeild Rauða Krossins sér um að halda utan um samkomuna líkt og undanfarna daga í Heimalandi.

Í dag verða klukkan 08:00 áframhaldandi upplýsingafundir sérfræðinga í upplýsingamiðstöðvunum í Skógarhlíð og í Hvoli á Hvolsvelli.  Þóranna Pálsdóttir veðurfræðingur og Steinunn S. Jakobsdóttir, jarðeðlisfræðingur verða á fundinum í Skógarhlíð en fulltrúi Jarðvísindastofnunar HÍ, verður á fundinum á Hvoli.